我叫阿明，琴日行大眾書局，見到本書個書名幾得特別，叫做《我將一位宅女變成女神，然後再將自己變成佢隻兵》，忍唔住買左返學校慢慢煲。睇完之後，萬分感慨，大概我同故事中嘅主角都係叫阿明，亦都同情佢嘅經歷。
我放返本書入抽屜，膽粗粗咁慢慢伸手向住坐我前面嘅女仔條馬尾進發，真係好想好似故事入面嘅主角一樣，慢慢玩弄對方條馬尾。點知，當我接觸到佢條髮尾時，仿佛觸到佢神經線一樣，對方即時轉身大罵一句:『妖! 整咩丫你! 想死丫!』
佢叫程若藍，佢唔係宅女，但佢依然無咩朋友，因為佢個串咀性格，未口開已經聞到陣陣MK氣味，令到妤多人都怕左佢。但係唔知點解，佢嘅毒舌反而吸引到我，每當佢罵我，串我個陣，我心裡反而有一絲絲興奮。
由於佢無咩朋友嘅關係，而且我地又坐單邊位，所以佢好鐘意搵我玩，丫.....係搵我黎玩。
若藍一手將我枱上所有野都掃落地下，我見怪不怪咁慢慢執返地下啲筆同書，邊執邊說:『又邊個激親你呀?』
『關你咩事?』說罷，佢又轉返身。其實我都預左，所以我完全無嬲，更將依啲行為當成情趣。
程若藍係一個絲打，成日都會上高登，本來我都無咩野，但自從睇左嗰本書之後，內心真係唔係咁想若藍上高登，好驚佢好似故事入面嘅阿靜一樣，上高登識朋友，最後捨棄左阿明。雖然我同若藍唔係識好多年，但至少只有我係佢身邊一直陪佢玩，陪佢傾計，如果若藍搵到替代品嘅話，我諗我會......我會唔開心。
若藍幾乎每日等緊車，返緊屋企嘅時侯都會打比我，次次都係有佢講無我講，每次傾電話，佢都將佢個日所發生嘅事全部講哂比我聽，講完或者返到屋企佢就收線，所以我每次都只係應:『嗯。哦。係咩?』雖然無聊，但我又好滿足。
有一日，佢Whatsapp我，話佢病左好辛苦，屋企又無人。我知道後，即刻衝落街買哂藥同粥跑去佢屋企，然後慢慢餵佢食。
『如果再唔好，我就陪你去睇醫生。』我苦心婆心地說。
若藍一副煩厭嘅樣，然後推開我說:『我要訓，你走啦。』
『我幫你執下屋啦，順便提你幾時食藥。』最後若藍都無好氣同我堅持落去，安安靜靜咁訓。我成日有意無意咁行入佢房，睇佢訓覺個樣就好似一隻小綿羊咁，完全想像唔到佢有一副毒舌。
後來佢病情無咩起色，我叫佢睇醫生，起初佢極度唔願意，最後我夾硬揹住佢走，一路上佢一直大大力箍住我條頸，好似一個細路女死都唔肯返學咁，雖然我好辛苦，但我都堅持送佢睇私家，雖然佢都屈服了。
有人話我係一隻出色嘅兵仔，每當聽到有人話我係若藍隻兵，我就覺得討厭，點解唔肯去好嘅方面去諗? 點解唔可以當成係培養感情? 我覺得我同若藍暫時發展得唔錯，至少佢肯比我去佢屋企照顧佢。
就快公開試，我都開始苦口婆心咁勸若藍溫書，因為我唔想我地任何一個人經過DSE後都要分離，至少我想大家都升到同一間大學。雖然若藍唔太願意，但最後都比我勸服，日日跟我去自修室。同時為左擴闊若藍社交圈子，我介紹左我身邊唔少朋友比佢識，歡迎佢加入我地嘅圈子，咁當然啦，介紹得比佢都係我細心挑選過，唔想唔覺意介紹左個"男朋友"比佢。
幾個月後，好景不常，正當我以為我地關係愈黎愈好嘅時侯，突然又有個打擊出現。我發現若藍成日都拎起手提同人Whatsapp，每次打字嘅時侯，佢都好開心，嘴角好似含春一樣甜絲絲，令我產生巨大嘅不安感。
『阿明，你搵第二個位溫書得唔得?』
『點解呀?』我真係唔明。
『我約左朋友溫呀，我留左位比佢丫!依家仲早，周圍都有位啦!你怕咩!?』
『點解要我走?』
『你唔走，咁我走。』
『OKOK!我走!』嗰刻我大概知道咩事，我亦都清楚再糾纏落去對我都無好處，唯有黯然咁離開。搵到位後，我就去廁所洗個臉諗住冷靜下。洗緊手嗰陣，好順手咁順便照下鏡，當我望住鏡中嘅自己時，突然間覺得自己好樣衰，樣衰到自己都頂唔順，若藍根本就唔會鐘意我......嗰刻我握緊拳頭，心裏有萬分嘅不甘，但卻無可奈何。
唔知係咪因為我地兩個成日一對一對咁出出入入，又一齊放學溫書，自自然然有好多緋聞傳我地已經一齊左，每當我聽到時侯，我就好似劉浩龍首緋聞男友一樣，面帶歡喜心裡難過，問我該怎麼慶賀!?
我心情一日比一日差，每一晚都唔知因為"自作多情"嘅想法而流左幾多眼淚，而若藍都搵到佢個"伴"去陪佢溫書，加上Study leave假期開始，我已經好耐無同若藍接觸，為左專心考好公開試，我決定點都要解開心中嗰條結，最後我係一班朋友面前捨棄左我嘅尊嚴。
『我求下你!黎緊我生日!幫我攪一個生日會!』我低著頭，雙手合住，竟然求人幫我攪生日會，真係柒到上心口。我將我對若藍嘅感覺同想法都講哂出黎，希望以生日會引若藍出現，同時個日向若藍表白。
『表白?你講到你地關係咁差，你仲想黎?』
唔知係咪一直講我同若藍嘅故事，一路講，畫面就一路出現以往同若藍嘅經歷，愈講我就愈傷心，講野都開始嗚咽，似喊未喊咁。
『雖然我知道佢唔會接受我，但至少......至少比我一個心死嘅結局。』
朋友們都你眼望我眼，依一刻都唔知講咩好。
直到生日會，若藍出現。已經好耐無見到佢，當佢笑住口同我講一句:『生日快樂。』心入面唔知點解突然酸左一酸，好想恨恨咁喊出黎，我真係想像唔到單戀嘅感覺係咁難受。若藍真係變左好多，比著以前嘅佢，一定話我學咩人攪生日會，又會祝我又離死亡近一步，如今卻笑笑口同我講生日快樂，完全Feel到嗰份真誠同埋......佢嘅改變。
整個生日會，朋友都藉機比位我地單獨，但奈何都搵唔到時機，直到若藍開口話夠鐘走人，成班人都亂了。
『下?咁快走?』
『我約左男朋友呀! 你地玩得開心啲啦!』
當若藍講完後，成班人都呆哂，包括我。直到若藍關上門走了後，先有人出聲:『咁.....仲表唔表白呀?』
我諗都無諗，都唔知邊到黎嘅勇氣，我竟然誇張地打開大門，追上Lift位。此時，若藍仲等緊Lift，見到我追出黎，不禁有點驚訝:『做咩事?我留左野係你到?』
我呆呆咁望住若藍，腦海一片空白，我地互相對方。
『我......我......鐘意你。』
依番說話將我往後嘅人生同性格都改變左。
(無限期待續)
Search